🛣️ रात्रीचा थरार — भंडारा महामार्गाचा श्वास रोखला गेला!

BHANDARA |- भंडारा तालुक्यातील गडेगाव वनआगार समोर महामार्गावर मध्यरात्री 1.30 वाजता दरम्यान 'बर्निंग ट्रक' चा थरार पाहायला मिळाला. नागपूरकडे जाणाऱ्या ट्रकला अचानक आग लागली. त्यात मालासह ट्रक जळून खाक झाला. प्रसंगावधान राखल्याने चालक बचावला. यावेळी काही काळ महामार्गावरील एका बाजूची वाहतूक खोळंबली होती.

रायगड येथून ट्रक भुईमुगाच्या शेंगा भरून महामार्गाने नागपूरच्या दिशेने जाण्यास निघाला. रात्री 1.30 वाजता दरम्यान धावत्या ट्रकला अचानक आग लागली. ट्रक चालक दिपक पवार (27) रा. बैतूल याला आग लागल्याचे लक्षात येताच त्याने प्रसंगावधान राखून जळता ट्रक महामार्गाच्या कडेला उभा करून स्वतः ट्रकबाहेर पडला. आगीत ट्रकमधील भुईमुंगसह ट्रक जळून खाक झाला. सकाळपर्यंत आग धगधगत होती. यावेळी काहीवेळ महामार्गावरील एका बाजूची वाहतूक विस्कळीत झाली.