🚨 लग्नासाठी घर बंद… पण रात्री घडली धक्कादायक चोरी! 😱

 

धुळ्यातील हाजी नगर परिसरात लग्नाच्या पत्रिका वाटण्यासाठी बाहेरगावी गेलेल्या कुटुंबाच्या घरी चोरी झाल्याची घटना नुकतीच समोर आली होती. फिर्यादी राशीद हुसेन अन्सारी हे आपल्या मुलीच्या लग्नाच्या पत्रिका वाटण्यासाठी परिवारासह भिवंडी येथे गेले होते. दरम्यान, 

बंद घराचा फायदा घेत अज्ञात चोरट्याने कपाटातील लॉकर तोडून 20 हजार रुपयांची रोकड लांबवली होती. घरी परतल्यावर राशीद अन्सारी यांना चोरी झाल्याचे लक्षात आले, त्यानंतर त्यांनी तात्काळ चाळीसगाव रोड पोलीस ठाण्यात तक्रार दाखल केली. 

या तक्रारीची गंभीर दखल घेत पोलिसांनी गुन्हा दाखल करून तपासाला वेग दिला. गुन्हा दाखल होताच पोलीस निरीक्षक सुरेशकुमार घुसर यांनी तपास पथकाला आरोपीला अटक करण्याचे आदेश दिले. पोलिसांनी घटनास्थळावरील सीसीटीव्ही फुटेज बारकाईने तपासले असता, त्यात पोलीस रेकॉर्डवरील सराई संशयास्पदरित्या फिरताना आढळून आला. 

पोलिसांनी तातडीने सापळा रचून त्याला ताब्यात घेतले. सुरुवातीला उडवाउडवीची उत्तरे देणाऱ्याला पोलिसांनी पोलिसी खाक्या दाखवताच त्याने गुन्ह्याची कबुली दिली. विशेष म्हणजे, हा आरोपी अवघ्या 20 वर्षांचा असून त्याच्यावर धुळे आणि जळगाव जिल्ह्यात 17 हून अधिक घरफोडीचे गुन्हे दाखल आहेत. पोलिसांनी त्याच्याकडून चोरीस गेलेली 20 हजार रुपयांची रोकड जप्त केली आहे.