💥 थंडीत सुकामेव्याच्या किमतींचा ‘स्फोट’! कारण अद्याप अस्पष्ट 😱

  थंडीची चाहूल लागताच बाजारात सुक्या मेव्याला चांगली मागणी वाढली आहे. मात्र या वाढत्या मागणीसोबत सुक्या मेव्याच्या किमतींमध्ये देखील लक्षणीय वाढ झाली आहे. शरीराला ऊब मिळण्यासाठी घराघरात सुक्या मेव्याचे लाडू बनवले जात असताना, वाढलेल्या किमतींकडे ग्राहकांनी मात्र दुर्लक्ष केलं आहे. नाशिकसह संपूर्ण जिल्ह्यात थंडीचा जोर वाढू लागला आहे. 

थंडीच्या दिवसांत शरीराला ऊर्जा देणारे सुकामेवा व त्यापासून बनणारे लाडू यांची जोरदार मागणी बाजारात दिसत आहे. पण मागणी सोबतच किमतींमध्ये मोठी उसळी दिसून येते आहे. खजूर, जो मागील वर्षी 150 रुपये किलो होता, तो आता थेट 200 रुपये किलो झाला आहे. खोबरे देखील 200 वरून थेट 350 रुपयांपर्यंत पोहोचलं आहे. दररोजच्या वापरातील काजू 750 रुपयांवरून 850 रुपये किलो झाला आहे. 

तर बदामाचे दर 750 वरून 850 रुपये किलो इतके वाढले आहेत. पौष्टिकतेसाठी प्रसिद्ध अंजीर मात्र सर्वाधिक महाग; मागील वर्षी 800 रुपये असलेला अंजीर आता 1000 ते 1200 रुपये किलो दरम्यान विकला जात आहे. आणि बेदाण्याच्याही किमतींमध्ये मोठी उसळी – 220 रुपयांच्या बेदाण्याचा दर आता थेट 550 रुपये किलो झाला आहे. दर वाढले तरी ग्राहकांची खरेदी कमी झालेली नाही. आरोग्यासाठी उपयुक्त असल्याने सुक्या मेव्याची मागणी अधिक असून, थंडीत शरीराला ऊब देण्यासाठी या पदार्थांना प्रचंड प्रतिसाद मिळत आहे.