CHH.SAMBHAJINAGAR 😱 थंड काश्मीरचं केशर उष्ण मराठवाड्यात फुललं! रहस्य काय? 🌡️

 

 केसर खाल्ल्याने सौंदर्य वाढतं अशी आख्यायिका आहे, पण हे केशर काश्मीर सारख्या थंड प्रदेशामध्ये लागवड केले जाते. पण तुम्हाला जर सांगितलं की, छत्रपती संभाजी नगर सारख्या उष्ण प्रदेशामध्ये सुद्धा केशरची लागवड केली जात आहे तर तुम्हाला आश्चर्य वाटेल ना... पण हे खरं आहे. छत्रपती संभाजी नगरातील सीए प्रिया अग्रवाल पहाडे यांनी स्वतःच्या घरातच कृत्रिमरीत्या केशरची लागवड केली आहे. 

 दुष्काळी भाग समजल्या जाणाऱ्या मराठवाड्यात केशरची लागवड, असा विचार जरी आला तर ते शक्य नाही, असंच वाटेल. मात्र, शहरातील सीए असलेल्या प्रिया अग्रवाल यांनी हा प्रयोग यशस्वी करून दाखवला आहे. जवळपास एक वर्ष अभ्यास करून घरातच छोट्याशा खोलीत त्यांनी केसरची लागवड केली आहे. 

जवळपास 35 ग्रॅम इतकं केशर घेण्यात यश मिळालं असून, पुढील काही दिवसात वेगवेगळ्या प्रकारच्या चाचण्या करून मोठ्या प्रमाणात व्यवसाय सुरू करण्याचा मानस असल्याची माहिती प्रिया अग्रवाल यांनी दिली. केशर शेतीबाबत अभ्यास : कुठलंही काम करताना त्याबाबत अभ्यास करायला पाहिजे असं म्हणतात. त्याच अनुषंगानं शहरातील सीए असलेल्या प्रिया अग्रवाल यांनी केशर शेतीबाबत इंटरनेटच्या माध्यमातून माहिती घेतली होती. काही ठिकाणच्या वेगवगेळ्या यशस्वी प्रयोगांची माहिती मिळाली, 

त्यानुसार संबंधित लोकांना, अभ्यासकांना संपर्क साधून अधिकची माहिती घेण्यास सुरुवात केली. पुणे इथे जाऊन केशर शेतीबाबत अभ्यास केला. तर काश्मीरमध्ये जाऊन प्रत्यक्षात केशर शेतीबाबत माहिती संकलन आणि अभ्यास केला. थंड वातावरणात येणारे केशर उष्णभागात घेता येऊ शकते, अशी खात्री पटल्यावर कुटुंबीयांसोबत चर्चा करून अखेर आपल्या घरातच केसर निर्मिती करण्याचा निर्णय प्रिया अग्रवाल यांनी घेतला.