🚨 पालिकेच्या गलथानपणाचा मोठा स्फोट? कचऱ्याच्या ढिगाला लागली आग! 🔥

 

NAVI MUMBAI | कामोठ्यात पालिकेच्या कचऱ्याला आग, दोन अग्निशमन गाड्यांच्या मदतीने आगीवर नियंत्रण  कामोठे शहरातील मानसरोवर रेल्वे स्थानकाजवळील मोकळ्या मैदानात आज सकाळी पनवेल महानगरपालिकेच्या वृक्ष विभाग आणि घंटागाडी कर्मचाऱ्यांनी टाकलेल्या कचऱ्याला अचानक भीषण आग लागली. काही क्षणांतच आगीच्या ज्वाळा वाढत गेल्या आणि धुराचे प्रचंड लोट परिसरात पसरल्याने नागरिकांमध्ये भीतीचे वातावरण निर्माण झाले. 

 घटनेची माहिती मिळताच माजी नगरसेवक विकास घरत यांनी तातडीने अग्निशमन दलाशी संपर्क साधला. त्यानंतर पनवेल महानगरपालिकेच्या दोन अग्निशमन गाड्या अल्पावधीत घटनास्थळी दाखल झाल्या. दलाच्या जवानांनी तत्काळ आग विझवण्याचे प्रयत्न सुरू केले; मात्र कचरा, झुडपे आणि सुक्या फांद्यांमुळे आगीने काही वेळातच उग्र रूप धारण केले होते. 

दरम्यान, पहिल्या गाडीतील पाणी अवघ्या 15 ते 20 मिनिटांत संपल्याने दुसऱ्या गाडीतील पाण्याच्या मदतीने दोन्ही पथकांनी संयुक्तरीत्या आग नियंत्रणात आणण्यासाठी जोरदार प्रयत्न केले. दीर्घ प्रयत्नांनंतर अखेर आगीवर पूर्णतः नियंत्रण मिळवण्यात यश आले. मात्र या आगीत दोन झाडांना झळ पोहोचल्याची माहिती मिळते. घटनेनंतर माजी नगरसेवक विकास घरत यांनी पालिकेवर तीव्र नाराजी व्यक्त केली. 

“मोकळ्या मैदानात नियमितपणे कचरा आणि वृक्षछाटणीचा माल टाकला जातो. त्यातूनच अशा दुर्घटना घडतात. जबाबदार अधिकारी आणि कर्मचाऱ्यांवर कारवाई करावी,” अशी मागणी त्यांनी केली. या आगीत जीवितहानी झाली नसली तरी पालिकेद्वारे मोकळ्या जागांत कचरा टाकण्याची पद्धत आणि त्यातून निर्माण होणारा गंभीर धोका पुन्हा एकदा समोर आला आहे. नागरिकांनी अशा घटनांना आळा बसावा यासाठी तातडीने उपाययोजना करण्याची मागणी केली आहे.