💥| फायर ब्रिगेड कर्मचाऱ्याच्या मृत्यू प्रकरणात दोन अधिकारी निलंबित 😨

अमरावती महानगरपालिकेच्या अग्निशमन विभागातील बडनेरा झोन येथे कार्यरत असलेले फायर ब्रिगेड कर्मचारी राजेश वासुदेव मोहन यांनी वरिष्ठांच्या जाचाला कंटाळून 20 नोव्हेंबर रोजी विषारी कीटकनाशक औषध प्राशन करून आत्महत्या केली. मृत्यूपूर्वी त्यांनी व्हिडीओद्वारे विधान नोंदवून सहाय्यक अभियंता यांना घटनेला जबाबदार धरले होते. 

 या घटनेनंतर नातेवाईकांमध्ये संतापाची लाट उसळली. मृतकाचे कुटुंबीय आणि भीम ब्रिगेडचे अध्यक्ष राजेश वानखेडे यांनी जिल्हा सामान्य रुग्णालयासमोर ठिय्या आंदोलन करून दोषींवर तत्काळ कारवाईची मागणी केली. दरम्यान, सलग तिसऱ्या दिवशीही आंदोलकांचा निषेध सुरू असून, आझाद समाज पार्टीचे प्रदेश पदाधिकारी मनीष साठे, रिपाई (गवई गट) पदाधिकारी यांनीही अट्रॅसिटी गुन्हा दाखल करण्याची मागणी रेटून धरली. 

थंडीत रात्री उशिरापर्यंत आंदोलन सुरू ठेवत दोषी अधिकाऱ्यांच्या निलंबनाशिवाय आंदोलन उठवणार नाही, असा पवित्रा कुटुंबीयांनी घेतला होता. अखेरीस मनपा प्रशासनाने कारवाई करत सहाय्यक अभियंता  या दोघांना तत्काळ निलंबित केल्याचे पत्र आंदोलकांना देण्यात आले. तथापि, अट्रॅसिटीचा गुन्हा दाखल न झाल्यास मृतदेहाचा अंतिम संस्कार करणार नाही, 

अशी भूमिका आंदोलकांनी आज, 22 नोव्हेंबर रोजीही कायम ठेवली. त्यामुळे शवविच्छेदन गृहासमोर मृतकाचे नातेवाईक आणि आझाद समाज पार्टीचे पदाधिकारी ठिय्या आंदोलन सुरूच ठेवत आहेत. या प्रकरणात काँग्रेस नेत्या अ‍ॅड. यशोमती ठाकूर यांनीही हस्तक्षेप करत, दोषींवर कठोर कारवाईची मागणी पोलीस आयुक्त अरविंद चावरिया यांच्याकडे फोनद्वारे केली आहे.